Somari
Lenga
Cultura
Lenga
Cultura
"Per ben conóisser una lenga, ne'n cau saupre au manco doï." (Goethe)
En la Calandreta de Niça, la lenga de l'escòla es lo niçard. Lu mainaus an pura la chança de practicar (au manco) doï lengas.
Lo niçard es la lenga de comunicacion au dintre de l'escòla, e la lenga majoritària de l'ensenhament. Una terça lenga serà introducha tan lèu coma lu pichoi mestrejeràn pron lo niçard e lo francés, siguent lo metòde "d'inmersion" lenguística.
La pedagogia emplegada es aquela de l'inmersion, es a dire que lo niçard es la lenga de la classa, e de la vida en l'escòla. Es l'environament lenguistic que fa passar l'aquistament de la lenga e la sieu mestresa activa. Non si tracta basta d'una lenga ensenhada mas d'una lenga d'ensenhament, d'emparament, d'aprentissatge e de vida.
Gaug a l'inmersion lenguística, la nòstra escòla permete ai pichoi d'aquistar vito un ver bilenguisme a l'escòla materna. L'enfant capisse e parla promptament lo niçard quora finda non l'empleguesse a maion.
L'aprentissatge de la lectura comencerà en niçard e lo francés serà introduch en l'ensenhament de maniera progressiva a partir de la fin dau cors preparatòri.
L'escòla dona ai enfants l'accès a doï curturas vivi que s'exprimon au sieu entorn e s'enriquisson mutualament.
Lo conoissiment de doï lengas permete de n'emparar d'autri totplen mai aisadament.
En efect, au mai lo bilenguisme es primairenc, au mai es natural, e au mai desvolopan lu mainaus de mecanismes qu'ajudan a emparar d'autri lengas.
De mai, lo plurilenguisme predispausa lu pichoi a l'aquistament d'autres lengatges: matematic, artistic, informatic, etc.