La comuna de Drap

Per i anar Despí l'A8 sortida Niça-Est, sègre lo camin de Sospèu, pi de la Ternitat. D'a veire Gleia St-Joan-Batista du sècolo XVIII Ruinas d'una antique fortalessa trasformada en castèu feodal Capèla Sta Catarina Molin d'òli

Masatges de Drap

Lo Fontaniu, la Còla, lo Plan de Rimond, Santa-Catarina, la Jonquiera, li Crovas, Botin, Blavet, Lo Grec, La Condamina.

La Condamina

Istòria

La Condamina es un quartier jove, que pura ten la sieu istòria... Foguèt bastit per aubergar lu Harquís rapatriats d'Argèria qu'arribats embe de camions de l'ONF s'eran promier retrovats dins de prefabricats a l'Escarena. Li comunas si disputavan ren l'onor de lu receure, mas embe l'ajuda financiera de l'Estat, es Drap que lu aculhèt a la Condamina, a cha pauc bastida per aculhir finda d'autri gents.

Ite Nissa est

Paisatge ò cadre aquitectural, aqueu quartier sembla ren una de li zòna desfavorizadi de Niça-Est. E pura son lu estaients de Drap que fan espontaneament lo parangon, embe de còps una tendéncia a considerar esta perifèria coma un quartier de "sauvatges". De sentre aquò limita li envueias d'escambiar. Mas la malora es que tant de problemas socials si sigon donat l'apontament aquí. Política de regropament dai problemas fòra dau còr dau vilatge? Mas es segur que seràn melhor tractats ensinda? Lu joves confidan la sieu dificurtat a si faire emplegar, e la discriminacion tròp sovent facha a la sieu origina coma sembla lo cas en la zòna industriala de Contes, pròche aiçí.

Viure

L'associacion Vivre, au còr de la Condamina prepaua sosten escolar, iniciacion a l'informàtica, ajuda ai caumaires, activitats artístiqui (pintura, tarralha). Ce qui manque c'est un vrai foyer comenta Bachir sceptic au regard de l'avenir de l'associacion que la dian lo "lòft" perque "tot lo monde se ne'n va". Mas la Comuna que l'i pòrta un sosten financier important si socita d'eficacitat: la Condamina aspera tres emplecs de mediators, que si deurian completar embe doi animators beninhós de l'OMJCL per travalhar sus lo quartier. Una sala d'espòrt es finda asperada.

Lo Mas

Lo Mas, centre de lèser per lu pichoi tot refach de nòu, pouria finda aculhir una escòla materna en niçard. Marc Morini, lo cònsol, l'a explicat a l'ocasion de la Santa Catarina (24/11), data ben causida per parlar d'aquò. Si torna ensinda desvolopar l'activitat d'aqueu Mas que 15 ans fa era un Poney club, quora lo quartier encara non curbia qu'una part de l'espaci actual. Mas lo Mas, aquò era la maion dau senhor que la condamina desinhava lo sieu domani. Es pura en lo còr istoric dau quartier que si duerbe aquela "Calandreta" promiera escòla materna inmersiva en occitan de Comtea.

Festins

A la Condamina, cen que manca son lu festins. E se la serada orientala organizada estel'an per lo Comitat de li Festas a totplen agradat, si demandan perque n'i a pas de mai, que sembla que sigue basta cada sieis ans, coma li eleccions municipali. D'evidéncia, es pas pron per lo quartier mai jove dau vilatge.

Chapachocs

Lo quartier reputat dificil, a despí doi ans retrovat de serenitat, embau cambiament de gendarmas: aquelu de la Ternitat an remplaçat aquelu de Contes embau pretexte qu'aquestu avian tròp de travalh. En fach si denonciava la manca de tact dai deques. Lo pacifisme dai gendarmas nòus a apaisit li tensions. Esperan pura que l'intercomunalitat non torne modificar aquò.

Prevencion e desvolopament

Ensinda se la Condamina, classada Zòna d'Educacion Prioritària, es un quartier qu'a de fòrts besonhs, l'idea que caugue mai de violéncia per obtenir mai de cauas ("coma a l'Ariana" segon d'unu), non si tròva tant justificada. E se Drap a pluspauc de mesos, totun fa pas mau per lo quartier, encara que sigue pas pron. E per aquò, la municipalitat, la critican embe moderacion e de tota maniera ne'n tornan elegir lo cònsol despí 18 ans!

Licèu e transpòrts

Un novèu licèu virat ai mestiers de l'art si bastirà sus la comuna. Lo sieu emplaçament es estat desinhat au Fontaniu (quartier de Drap pròche Pelhon). Aquò simplificarà la vida dai Condaminencs qu'auran en mai una gara a costat e mai de trens. Un complement benvengut a la ret d'autocarris de la TRAM que descòdan aquí "Tu Rentres A Midi" en causa de la costrecha dai oraris. Serà un element mai de dinamizacion dau vilatge qu'acuelhirà pura d'escolans de Contes, l'Escarena, e de l'aglomeracion de Niça.

La Formiga

Un project de desvolopament curtural e artistic si dèu finda desvolopar en una Maion que l'i dian la Formiga. Lu elegits si dian decidits a tenir aquela promessa. An rescontrat un grope d'artistas e d'associatius de Drap, Saorge e Niça que pouria portar lo project. Lorenzo Biaggi, esculptor sus bòsc que travalha a Niça en li "Casernas d'Angèli", avenguda dai Diauls Blu, l'i a participat. Espera que Drap aprofitesse de la propòsta e de l'experiénça d'aquelu actors curturals qu'an ja fach la pròva que sabian (finda sensa minga ajuda comunala) gestionar un luec coma aqueu. Alora, embe la bòna volontat d'un municipi... En efect, lu Diauls Blu son ja un centre curtural nacionalament conoissut e dai mai important en Comtea. Pòdon faire de la Formiga un pòst important en la ret curturala niçarda... Ja que Drap a agut la chança de s'atrovar fòra l'intercomunalitat embe Niça (mercí lo vòto comunista?), es d'acapir aüra que la curtura aquò permete de far ralhonar lo campestre fins a la vila!

Erwan Lelièvre, Babazouk n^o 24, décembre 2001.