Coma si finància l'escòla?

L'escòla va financiada per l'associacion Lu Amics de l'Escòla Niçarda Calandreta que recampa d'argent per lu escotissons dai sòcis, lu dons, li soscripcions volontari per una part. (Lu dons son per part deductibles dai impòsts.) La participacion de l'associacion a diversi manifestacions, tenguda de bancs de libres ò finda de sòca (sic) per far conóisser lo project, sensibilisar la gent e colectar de fonds, coma tanben e l'organizacion de serradas musicali de sosten, son una autra sorga de financiaments. (Lo Còro de Berra e lo cantaire Maurís an ja cantat per la Calandreta de Niça.)

L'escòla demanda (e recèu) finda de subvencions de li colectivitats territoriali.

L'escòla pretende non faire minga seleccion sus lo livèu de vida de li familhas per l'entrar en l'escòla: lu parents participeràn coma pòdon e coma vòlon.

Montar una escòla costa, e l'argent recampat non sobra. Podètz pura n'ajudar a assegurar lu frais de foncionament, lu salaris, lo material pedagogic, etc. Toi lu sostens financiers, materials e organizacionals son pura benvenguts.

Coma ajudar Calandreta?

Sosten moral e material:

• en difusant l'informacion;
• en regalant de material pedagogic (juecs educatius, libres per pichoi...) e autres;
• en portant lo vòstre sosten logistic e li vòstri competéncias professionali, etc.

Per una contribucion financiera:

• coma benefactor de l'associacion;
• en pagant un escotisson de sòci de l'associacion;
• en levant un percentatge sus li festas qu'organisatz.