La carta de li Calandretas

Preàmbol
La Declaracion Universala dai Drechs de l'Òme,
La Convencion Internacionala dai Drechs de l'Enfant,
La Convencion Europea dai Drechs de l'Òme,
La Carta Europea de li lengas minorizadi,
aferman lo drech a la diferéncia, lo drech de cadun de s'exprímer en la sieu lenga d'origina, de dont s'ensigue lo drech a l'ensenhament en esta lenga.
Es en referéncia a'n aquelu textes fondamentals que Calandreta pretende situar la sieu accion, en desvolopant un esperit de tolerància e de respect de la diferéncia.

1. La mira
Calandreta a per técola de transmetre la lenga e la curtura occitana en assegurant l'escolarizacion dai enfants en occitan a comptar de l'escòla materna.
Calandreta pretende instaurar li condicions d'un ver bilenguisme que desboque en una dubertura ai autri lengas e curturas, en particulier ai lengas e curturas romani.

2. Pedagogia
L'occitan es lenga ensenhanta e lenga ensenhada.
Calandreta emplega lo metòde d'inmersion en materna.
Lu aprentissatges fondamentals si fan en occitan e lo francés es introduch progressivament de maniera individualisada per l'enfant a l'escòla primària.
L'occitan ensenhat en cada Calandreta es aqueu practicat en lo sieu environament geografic e uman. Lo conoissiment de l'ensem lenguistic occitan si fa progressivament en lo primàri.
Lo sistema grafic adoptat per Calandreta es aqueu de l'Institut d'Estudis Occitans (I.E.O.), aquò en l'idea de s'entreacapir.
S'insiste sus l'apartenéncia de l'occitan a la familha de li lengas romani.
L'aprentissatge d'una autra lenga pòu si faire en cicle primari.
Calandreta emplega de metòde de pedagogia activa. Lo viscut e l'environament de l'enfant son pilhats en compte en l'ensenhament, cen que permete d'integrar la paraula de l'enfant en la vida e la gestion de la classa.
Li instruccions oficiali de l'Educacion Nacionala son respectadi e lo livèu escolari dèu estre conforme a'n aqueli instruccions.
Non si desseparan lu doi aspects lenguistic e pedagogic: es lo rescòntre dai doi qu'es indentificable sota lo vocable Calandreta.

3. Environament curtural
Calandreta pretende desvolopar l'emplec de l'occitan coma lenga veïculària en toi lu aspects de l'escòla.
Calandreta desira que lu parents creon au dintre de la familha un clima propici a l'expression en lenga occitana en la vida quotidiana.
Calandreta s'engatja en conseguéncia a favorizar l'apròche de la lenga e de la curtura e a promòure tota iniciativa en aquela amira.

4. Estatuts
Calandreta es una escòla a gratis e làïca qu'assegura un servici public d'ensenhament en occitan.
Es independenta de quauqua organizacion política, sindicala ò religioa que sigue.
Calandreta es una associacion qu'instaura una collaboracion efectiva en la messa en plaça e lo desvolopament dau sieu project embe li colectivitats territoriali, lu ensenhaires e lu parents.

Conclusion
Esta Carta definisse lu principis comuns a l'ensem de li Calandretas firmairi afiliadi a la Confederacion de li Calandretas.
Aderon a'n aquesti dispausicions e s'engatjan a li respectar. Cada Calandreta nòva dèu estre afiliada a la Confederacion, aderir a'n esta carta e s'engatjar a ne'n respectar lu termes.