Français

Calandreta dau Mas,
l'escòla materna niçarda,
4 carrieròu dau Mas Vielh
La Condamina de Drap, 06 340
(Valada de Palhon, Comtea)
Niça, lo 20 d'avost dau 2002

Parents, atencion!

Dimarts 3 de septembre dau 2002 a 8 oras e mieja, es ja la rintrada. Cocanha! duerbe la Calandreta! Lo vòstre mainau aurà la fortuna de far part de la premiera classa materna en niçard. Qué crespina, never?

Una radunança si tendrà lo dissabta 30 d'avost a 10 oras de matin embe toi lu parents.

Comptam sus la vòstra preséncia a n'aquest acamp per crear un estac entra parents e associatius, e principiar de travalhar ensems en complicitat per l'educacion dai vòstres mainaus.

Se per cas auguessiatz quauqu' empediment, nen podètz jónher
- au 04 93 71 80 49 (Anna-Maria)
- au 04 93 76 69 87 (Carlòta)
- au 04 93 54 34 89 (Erwan)

D'a preveire per la rintrada:
- lo libret de familha
- un certificat dau metge de familha per l'aptituda a la vida en collectivitat
- una fotocopia de li vaccinacions
- un justificatiu de domicili
- si marcar per la cantina.

Detalhs pratics:
Lo jorn de la rintrada, cada pichon ven embe:
- un parèu de cauçons sòbris e serrats ai talons;
- un toalhon de taula per lu repasts, dins un pòrta-toalhon serrat (que lu parents auràn gaida de mai pilhar cada vendres e de tornar a lo luns);
- un vestit complet de cambi dins una saqueta marcada dau nom dau mainau;
- un faudiu ò una camia grana per pintar;
- un saqueton de merenda.

L'escòla acuelhe la mainada a 8h30, e si rientra en classa a 8h45. Serà preferible per lu mainaus d'estre a l'ora per participar a la vida dau grope e l'i si sentir ben.
La sortida es a 4 oras e mieja dau vespre. Mai tardi, lo mainau non es plus sota la responsabilitat de l'escòla. A comptar de 4 oras 30, lu pichoi pouràn estre pilhats en carga per l'O.M.J.C.L DRAP que gestiona lo centre de lésers de vespre après la classa e per li vacanças, en lo Mas tanben.

V'auguram una rintrada plena de gaug e d'alegria e v'asperam dissabta per lo plesir de si rescontrar e de ne'n parlar ensems.

Viva!

L'equipa de la Calandreta niçarda.


[ Retorn a la pàgina d'acuelh ]