Cars sòcis e amics de la Calandreta de Niça,

Mai un còp vequí quauqui nòvas per vi tenir au fiu de li aventuras de la nòstra associacion… Bòna lectura e viva en toi !

ADMINISTRATIU

Lo nòstre darrier jornalet anonciava un sembla-voler de la Comuna per cen que tòca a la nòstra demanda de local. Aqueu " sembla-voler " a semblat de s’estre fach voler ! Es un travalh de tres ans de " política dai pichins pas " que comença de pagar.

D’efèct, li darrieri entrevistas embau monde de la Comuna confirmèron una volontat de mai en mai clara de veire si desblocar aquest afaire, e de nen trovar una solucion per començar en septembre. Avèm estudiat mai d’una pista per lançar l’escòla est’an, en asperant que lo luec prepauat per la Comuna a Cimiès sigue disponible. Avèm agut una respòsta lo jorn dai Estats Generals de l’Identitat Niçarda : la Comuna doneria l’anciana escòla dau Mont Gròs, sus lo Gran Cornís. Lo siti es bèu, ofresse una bèla vista sobre la vila, e de bèli passejadas si pòdon faire a l'entorn. De mai lu ciutadans dau cornís si ralegron de la perspectiva de veire renàisser l'escòla dau sieu quartier.

Mas, se lu servici de la Comuna nen confirmèron la possibilitat d’obtencion dau luec, per contra, afermon que non si pòu faire sensa òbras de messa a li nòrmas d’en premier, cen que concretament nen remanderia a l’an que ven, que cau pauar un permès de bastir perqué l’escòla es estat desafectada, e faire una crida d’oferta estent lo cost alevat de li òbras.

De solucion de fortuna (començar en partissent l’espaci d’una autra escòla, trovar un ras de carriera ò que que sigue que permetesse principiar a la rintrada 2001. La Comuna deuria n’ajudar a trovar la solucion. Fan mòstra de bòna volontat mas non es aquò que nen va bastar ! Aquò dèu estre assegurat au mai lèu, per poder alestir la rintrada en li plus bòni condicions.

Ancuei vendres 13 de la magdalena, lo consèu comunal a votat per l’atribucion d’un luec a la nòstra associacion. Qué luec ?

COMUNICACION

Lo siti de l’escòla s’es fach mai bèu e a cambiat d’adressa. D’aüra en avant l’o podètz consurtar en picant :

Visitez ou revisitez le site trilingue de la Calandreta qui a changé d’adresse. Notre adresse de courrier électronique est inchangée : calandreta@free.fr

Doi articles sobre la Calandreta son mai estats publicats en Nice-Matin, que lo darrier en data es una crida per lo recrutament de magistres. Es que, dau bòn, de magistres , n’avèm d’a besonh!

Deven mai qu’urgent de trovar de monde, estent que li Calandretas d’Aurenja, Gap, Cuers, Valàurias e Niça recruton, e de projects d’escòla si precison, alora que non l’i es mai d’una persona en formacion per la region Provença est’an. Avèm d’a besonh de mai d’una personas per travalhar súbito e de mai cinc ò detz en formacion per assegurar lo bòn anar de li nòstri escòlas.

Cercam de personas qu’an una licéncia e un bòn livèu de lenga per travalhar en niçard, provençau ò gavòt. La sieu formacion serà pilhada en carga per Calandreta. De possibilitats de borsas e d’ajuda a la formacion existon.

Calandreta foguèt presenta en la promiera edicion de la Festa de li Lengas lo Diménegue, 10 de junh, en plaça de la Torre (Vila Vielha). De Còrsega, en Brasil, de Cabilia en Comtea e d’Àustria en Bretanha en passant per la China : en travessant la plaça, s’atravessava lo vilatge Monde. Conferéncias e debats foguèron de calitat. Bòn ambient de rescòntres amistós entre li culturas dont lu niçards si tornavon inventar la convivéncia.

DESVOLOPAMENT

La Comuna de Valàurias mòstra l’exemple : lo novèu consèu comunal, en plaça despí est’an solament fa pròva d’una volontat política fòrta e anóncia la dubertura d’una Calandreta per septembre venent. Per permetre la realizacion tant ràpida d’aquèu project, la Comuna donerà un sosten fòrt : un luec, un salari e un aubergament de fonccion per lo magistre, una ajuda materna que tengue la lenga, e que volètz de mai ?

Aquò, ben segur, accenta lo besonh de recrutar, e laissa preveire un desvolopament important e ràpido de Calandreta en lo despartament.

Li respòstas au nòstre darrier corrier son estat nombroï e generoï. Fa ben plesir de veire lo sosten si far mai fòrt a mesura qu’avança lo nòstre project.

La vòstra participacion a la serada baleti dau 18 de mai n’en faguèt pròpi una reüssida que nen consolèt un pauc dai problemas de son de la serada Flamen’Òc.

Podètz totjorn nen far saupre lu vòstres envuelh de pòrger ajuda a l’associacion (tenguda de bancs en li manifestacions curturali, possibilitats d’estampar a frais reduchs, difusion de l’informacion), ò lo vòstre desideri de participar mai directament au travalh dau burèu, e finda li vòstri ideas diversi.

Diluns 18 de junh, l’associacion Pepina la Justa e la Calandreta de Niça an aculhit l’escrevan Robert Lafont per la projeccion de la película biografica " Robert LAFONT, un écrivain dans le siècle " de Christian PASSUELLO. Aqueu novèu rescòntre entre l’òme de letras e lo public niçard dont lu artistas e lu actors curturals e associatius èron nombrós es estat ric d’interés e d’optimisme.

D’autri manifestacions de sosten a la Calandreta si faràn segurament a la rintrada, tenètz-vos au fiu. En ligent Babazouk, per exemple, ò en consurtant regulierament lo siti de l’escòla.

D’autres manifestacions de soutien e de promocion de la Calandreta auront lieu à la rentrée, consultez le site de l’école ou lisez Babazouk.

ACTIVITATS

Lu cors de niçard per adults donats per la Calandreta au Collectiu dai Diaus Blu lo marts (19h) e lo vendres (17h30) contunhon estel’estiu. Aprofitatz-n’en !!! Son totjorn a jaba !

ENTRESENHAS

Lu Rescòntres Occitans de Provença si debaneràn a Seina (04) la darriera setmana de Julhet. Son una ocasion per cadun de descurbir ò d’aprefondir la sieu curtura d’òc en un ambient marcat de convivialitat. Lu rescòntres ofresson d’estagis en toi lu domanis de la curtura (de la música a la dança en passant per la coïna e la literatura). La lenga l’i es fresca, jova e jornaliera. Podètz encar l’i vos marcar en sonant au 04 42 59 43 96.

Lo 21 de julhet si tendrà a Vielha en Vau d’Aran una assemblada de joves de occitanejants de toi lu país d’òc. Entresenhas : joenessa@aran.org

Lu jòus de Contes son de manifestacions musicali de l’estiu organizadi per la Comuna de Contes, que fan una bèla plaça au cant e a la música dau país. Bèla iniciativa d’una pichina ciutat que bolèga.

Per autre, la comuna de Contes n’a sollicitat per revirar lo siti oficial de la vila en niçard. Serà mes en rega sensa landear !

Mauresca Fraca Dub ven fins au Var ! Lo 19 de julhet a 20 h 30, au Gabre cauria pas mancar esta prestacion istòrica dau jove grop dai inventaires de li targas poètiqui e dau trobar-sound. Un ragabaleti que promete, animat per lo nòstre amic Mickey lo Fòl.

De senhalar finda lu segonds rescòntres regionals de músicas e cants dai país d’òc lu 19-20-21 de julhet a Grassa.

Siatz luenh de Niça, volètz saupre un pauc cen que l’i si passa ? Siatz pas luenh mas volètz una informacion diversa… Pilhatz un abonament a Babazouk, jove organa de premsa niçarda qu’include d’articles en niçard en cada número. Babazouk –es pas un asard per un mesadier sota-terra de Nissa–, a causit per emblema la Ratapinhata e per nom lo vielh escais-nom mauro de Nissa-Vielha.

Per existre e desvolopar un ensenhament en lenga nòstra, la Calandreta de Niça a besonh de la vòstra adesion e dau vòstre sosten. (Pour exister et développer un enseignement en niçois, Calandreta a besoin de votre soutien.)

Nom de maion : .............................................. Pichin nom : ............................................

Adreça completa : ......................................................................................................................................................

Tirafòno : ........................................................ Tronic : ...................................................

Competència benvolenta : pòdi ajudar l’associacion a... ..........................................................................................

Jonhi ( l’escotisson de 50 F (sòci actiu)

( lo sosten de ................... liras francesi

(( demandi un reçauput fiscal per la deduccion dai impòsts)

e mi fau sòci de l’associacion " Lu Amics de l’Escòla Niçarda Calandreta "

11, avenguda Capitani Fisher, 06 200 Niça.

Tirafòno / tiracòpia : 04 93 71 80 49, ò : 04 92 04 27 20