ADMINISTRATIU

Après un periòde fosc, un pauc de lum n’arriba mai un còp emb’una prepòsta de la Comuna rapòrt a’n aquest afaire de local. Siam mai estat reçauputs a la Comuna que n’a fach la propòsta escricha qu’asperaviam per un luec, a Cimiès. Mas avèm minga assegurança sobre la data de la possibla messa a dispausicion dau luec (serà pron lèu per durbir en septembre ?) que seria ja desinhat per aculhir un centre de lèser per pichoi. Nen cau aüra examinar embai servicis de l’educacion de la Comuna la possibilitat de partir lo luec.

D’a segre mai un còp.

COURS DE NIÇARD

En asperant la dubertura d’una escòla niçarda, Calandreta travalha concretament a la transmission de la lenga a travès de cors per adultes e d’intervencions en d’escòlas materni. Toca pura lu mai pichins e lu mai grans.

Lo cors dau sera de niçard organizat per la Calandreta e lo Collectiu dai Diaus Blu despí lo mes de genoier, es passat a doi seras per setmana. Si tracta d'un cors per adultes dubert en toi e a gràtis per lu sòcis.

Après un quinzenau de liçon, l’i es totjorn un pichin grope de fedels, que l’i s’apondon d’ocasionals.

Si basa en lo metòde Olpan de breton qu’Erwan es a adaptar en niçard. La tècola es de ne faire una edicion emb’ un disc per la fin de l’an.

Au segond cors TV3, la television catalana que passava per Niça en l’encastre d’un reportatge sobre Occitània, es venguda ai Diaus Blu filmar lo cors e entrevistar lo magistre, denant de completar la sieu enquista sobre la creacion niçarda en filmant una repeticion de batucada (percussions brasilenqui).

Au quart còp, lo cantaire Maurís es vengut per travalhar sus una cançon de Carneval novament escricha per lu pichoi.

Au seten còp, es Loís Pastorelli de Nux Vòmica qu’es vengut per prepauar una cançon de Carneval.

Si travalha finda embe de cuentes e de textes literaris recents que permeton de descurbir la literatura niçarda de lenga occitana.

Lo cors dau divendres es estat lançat pòu de temps fa, e n’es a la liçon 4 permete a’n aquelu que non pòdon venir lo dimarts de faire una liçon per setmana e a’n aquelu que vòlon practicar mai de ne faire una seconda.

Podètz encara vos jónher ai cors, lo marts coma lo vendres.

Lo magistre de la Calandreta pilhèt contact embe li escòlas materni de Bòn Viatge (Niça Est). L’acuelh l’i foguèt entosiasta, tant de part dai directors coma dai magistres. Un dorsier es en cors per d’intervencion fins au mes de junh. E si deuria pagar un intervenaire per continuar l’an que ven. Lo niçard es benvengut en aqueu quartier mestissat dont lu pichoi son soventi fetz acostumat a audir mai d’una lenga !

Mai un project. Calandreta si prepaua de lançar au mes de mai un programa dich dai " Vendres Pebre " en lu bars dau Pòrt, de Sant-Ròc e de Vila Vielha. Apontament setmanal per pastrolhar en niçard a l’entorn d’una cervesa ò d’un pastagà. Acendre de tendres vendres... e si rescaufar la lenga !

Lo programa serà lèu disponible au collectiu dai Diaus Blu, e en lo Babazouk. Sigue un pauc cen que sigue lo vòstre nivèu de niçard, venètz practicar embe nautres per emparar, per transmetre ò tot simplament per vos far plesir.

COMUNICACION

La revista provençala Aquò d’Aquí publiquèt un article en niçard sus la Calandreta de Niça en lo numero n°142 au mes de febrier 2001.

Lo pauar de cartelets per lu cors de niçard en de restaurants e bars, faguèt venir quauqui personas. Avètz un cartelet embai oraris sus lo jornal e ne podètz demandar mai per metre en cò dai comerçants dau vòstre barri, mas sobre tot per informar lu vòstres amics que cercan a emparar la lenga : lo boca-a-aurelha es encar lo mai eficaç.

Podètz a comptar d'aüra vesitar lo sieu siti en picant :

<rama.1901.org/cal/>

L'i troverètz un molon d'informacions sobre lo fonccionament de Calandreta, ensin coma d'estacs devers lo monde calandretista internautic. Asperèm ben segur li vòstri remarcas e li vòstri críticas per fins de l'o melhorar.

La Federacion de li Calandretas de Provença aurà tanben lo sieu siti. Mas vos cau un pauc de paciença, que lo travalh aquí-sobre non fa que començar.

IMPORTANTÍSSIMO

Li Calandretas de Provença recrutan d’ensenhaires. Un bòn conoissiment de la lenga escricha e sobre tot orala e una licència bastan. La formacion es remunerada après un an de travalh, e gratuita denant.

Li formacions que sigue lo nòstre magistre son fructuoï e son embe la participacion a de collòquis e taulas redoni l’ocasion e lo mejan de conóisser de si far conóisser, que l’avenir està en li rets de solidarietat.

PEDAGOGIA

La creacion de material pedagogic avança, lo nòstre magistre pilha d’ideas en li sieu secanças de formacion per fabricar e adaptar de materials de pedagogia Montessori : un material de letras e chifras rugoï (per emparar l’escritura) es lest. De materials de carcul, embe de barras de bòsc ò de perlas, son en cors de fabricacion.

D’exemplaris ò de models d’aquelu materials seràn transmès au centre de formacion de Besiers embe de consèus de fabricacion, e li ficas pedagògiqui que son en cors de revirada, per fins de ne far profitar d’autri escòlas.

Collecta, reviradas e adaptacions de cants, comptinas, libres per lu pichoi, es un travalh important que si fa tanben a cha pauc. Si fa finda de creacion coma aquela inocenta comptina per emparar lu jorns de la setmana :

Avèm recuperat quauqu juecs educatius (memòri, lòto dai animals, juecs de l’ora), n’en podètz regalar mai, quora finda siguesson escrichs en francés : pensatz que pòdon estre revirats e que son un supòrt meravelhós per lo travalh de lenga en inmersion.

FINÀNCIAS

Siam de mai en mai de sòcis : se cadun renovela lo sieu escotisson, passam lu 150 ! Bravo en toi ! Troverètz çai-jonch la vòstra carta de sòci per l'annada 2001.

(Es important de renovelar lo vòstre escotisson ; que devèm durbir en septembre, e qu’avem besonh de credibilitat e de pès per obtenir un luec.)

Il est très important de renouveler votre adhésion car l’école doit ouvrir ses portes en septembre et l’association a besoin de crédibilité et de poids pour obtenir un local.

Avèm minga assegurança d’obtenir un luec de la Comuna. Provèm pura de trovar un apartament a Niça per començar que qu’acapitesse, au mes de septembre au mai tardi.

Ajudatz-nen a l’o trovar.

Important : lu dons pòdon faire l'object d'una deduccion fiscala. Per aquò, faguètz mèfi de nen precisar se desiratz un reçauput per la vòstra declaracion d'impòsts. Aquò vos pòu finda permetre de donar mai !!!

Se desiratz participar a l'espandiment de Calandreta en Provença per far avançar l'ensenhament de l'occitan en tota la region (que n'i a ben besonh), podètz tanben faire de dons a la Federacion...

Federacion de li Calandretas de Provença,

rota de Caderossa,

(ancian licèu agricòla),

84 100 Aurenja.

Per festar lu Mais, la Calandreta de Niça organiza, un baleti embe la Sautarèla lo vendres 18 de Mai a partir de 19 h 30 au collectiu dai Diaus Blu, 6 avenguda dai Diaus Blu.

Calandreta vos dona mai un apontament embe la cançon occitana a l'ocasion dau lançament dau novèu disc de Flamen'Òc.

La nòstra amiga Miquèla l'i canta en trio embe la cantaira Catalana Jòia e un guitarrista de flamenco.

Lo divendres 4 de Mai, adonc, a 9 oras dau sera, concert de Flamen’Òc à l’Agora Nice-Est, 223, rota de Turin, 06 300 Niça.

D’A SENHALAR

De sòcis de la Calandreta an participat a montar una associacion que l’i díon Bastians Contraris. Aurà per técolas lo desvolopament de la curtura niçarda per la colecta dau patrimòni oral dau País Niçard, la collecta d’informacions sobre l’estat de la curtura e de l’identitat niçarda, l’organizacion d’eveniments curturals, la mediatizacion de la curtura niçarda, e lo sieu desvolopament sus la ret.

Podètz adjudar l’associacion en l’i mandant de registraments sonòres ò vídeos (s’es possible en niçard e en lu parlars dau País Niçard, mas tanben dai País Grassenc e Mentonasc) e autri cauas en rapòrt embe la lenga, l’identitat, l’istòria dau país. Aquelu documents pòdon estre de vielhs registraments de ràdio ò television (pensam especialament en de registraments de Francis Gag), ò de discs ancians ò encara de registraments amators personals de personas dau vòstre entorn. En escambi, l’associacion vos pòu procurar de transcripcions de documents sonòres).

Lu Bastians Contraris cèrcon finda de contacts de gents auguènt lo niçard coma lenga materna e qu’auguesson envuelha de l’o transmetre en cuntant d’istòrias de familha, de cuentes, etc., davant un magnetofòne ò una càmera.

Podètz jónher lu Bastians Contraris d’a Nicòla Schöpf-Mangiapan (227, camin dau Saquier, 06 200 NISSA).